Алматыда ескі телефондарды тастайтын жәшіктер қойылды

АЛМАТЫ. ҚазАқпарат - Алматының туристер мен қалалықтар жиі баратын орындарға қоқысқа айналған электронды құрылғыларды тастайтын арнайы жәшіктер орнатылды, деп хабарлайды ҚазАқпарат тілшісі.

Тұрмыстық қалдықтарды түріне қарай жіктеп арнайы жәшіктерге салу оларды қайта өңдеуге аса тиімді.

«Промтехноресурс» компаниясы өкілдерінің айтуынша, Алматы орталығындағы мектептердің аумағына да арнайы қоқыс жәшіктері қойылып жатыр. Қазір олардың жалпы саны 30-ға жеткен, бірақ жуық арада 60-тан асады.

Әсіресе электронды құрылғыларды қауіпсіз жою мәселесі ірі қалалардың өзекті проблемаларының бірі болып отыр. Соңғы жылдары халық саны күрт артқан Алматы үшін де бұл маңызды.