Алматыда есірткіге еліткен автобус жүргізушісі жолаушылар тасымалдаған
2022 жылғы 12 тамыз 12:03

Алматыда есірткіге еліткен автобус жүргізушісі жолаушылар тасымалдаған

АЛМАТЫ. ҚазАқпарат – Алматыда есірткі қолданған автобус жүргізушісі ұсталды, деп хабарлайды ҚазАқпарат тілшісі.

Алматы қалалық полиция департаментінің мәліметінше, №118-ші бағыттағы қоғамдық көлік Абай даңғылы мен Өтеген батыр көшесінің қиылысында тоқтатылды.

«Тәртіп сақшылары әрекеті күдік туғызған жүргізушіні тоқтатып, оны медициналық куәландырудан өткізуге апарды. Сараптама қорытындысы бойынша нарколог-дәрігерлер оның есірткіге мас болғанын анықтады»,- деді Әкімшілік полиция басқармасы бастығының орынбасары Дәулет Сейітқұлов.

Полиция өкілінің айтуынша, жүргізуші қоғамдық көлікті басқарудан шеттетілді.

«Алматы қаласы бойынша мамандандырылған ауданаралық әкімшілік сотының шешімімен ер адам 8 жыл мерзімге көлік құралын басқару құқығынан айырылды, сонымен қатар 15 тәулікке әкімшілік қамаққа алынды»,- дейді ол.

Сонымен қатар автобус мамандандырылған айыппұл тұрағына қойылды.

«Сондай-ақ, есірткіге масаң күйдегі жүргізушіні жолаушы тасымалдауға рұқсат берген автокәсіпорынның медицина қызметкеріне 150 мың теңге көлемінде айыппұл салынды»,- деді Дәулет Сейітқұлов.


Ұқсас жаңалықтар
Серіктестер жаңалықтары

Jańalyqtar

Үрдіс

MURAǴAT