Алматыда ерекше балалардың қатысуымен ұлттық инклюзивті ойындар өтеді
Қалалық әкімдіктің мәліметінше, «Жұлдызай» ұлттық инклюзивті ойындары Балуан Шолақ атындағы спорт сарайында және Алматы қаласының орталық стадионында 26-30 қыркүйек аралығында спорттың 6 түрі бойынша өтеді.
Онда шағын футбол, үстел теннисі, жеңіл атлетика, голбол, бочча, бес тас және асық ату ұлттық ойындары қамтылады. Қатысушылар саны - 310 бала.
«Жұлдызай» ойындары Мәдениет және спорт министрлігінің 2022 жылғы спорттық-бұқаралық іс-шаралардың бірыңғай күнтізбелік жоспарына енді.
Ойын жеңімпаздары халықаралық жарыстарға қатысып, спорттық разрядтар ала алады.
«Биылдан бастап «Жұлдызай» ұлттық инклюзивті ойындарына айналған спартакиада еліміздегі ерекше білім беру қажеттіліктері бар 10-18 жас аралығындағы балалар мен жасөспірімдер қатысатын жалғыз кәсіби спорттық жарыстар болып табылады»,- деп хабарлады әкімдіктен.
«Жұлдызай» корпоративтік қоры көп жылдар бойы ерекше балалардың өмірін жақсартуға, шығармашылық және спорттық қабілеттерін дамытуға бағытталған шығармашылық, спорттық, медициналық және әлеуметтік жобаларды жүзеге асырып келеді.