Алматыда электрлі самокатты пайдалануды үйрететін мектеп ашылды
2022 жылғы 19 тамыз 19:31

Алматыда электрлі самокатты пайдалануды үйрететін мектеп ашылды

АЛМАТЫ. ҚазАқпарат - Алматыда электрлі самокатты тебуді үйрететін мектеп ашылды. Мұнда кәмелет жасына толған барлық азаматқа самокатты қала жағдайында қауіпсіз және дұрыс пайдалану тегін үйретіледі, деп хабарлайды ҚазАқпарат тілшісі.

Электрлі самокаттарды жалға беру қызметін ұсынатын компанияның сыртқы байланыстар бөлімінің басшысы Даниил Капцаның айтуынша, қала тұрғындары самокаттарды дұрыс жүргізуді және тұраққа қоюды үйренеді. Сондай-ақ жеке қозғалыс құрылғысын пайдалану ережелерімен танысады.

«Бүгінгі күні әлемде электрлі самокат – жаңа көлік түрі болып саналады. Ол барлық ірі мегаполистерде бар. Адамдар бұл көлікке үйреніп, оны қолдана да білуі қажет. Автомектеп – қарапайым, бірақ өте маңызды қауіпсіздік ережелерін үйретеді. Біз бұл мектепте жол жүру ережесін кез келген адамға түсіндіреміз», - дейді Даниил Капцан.

Электрлі самокаттарды жалға беру қызметін ұсынатын компаниялар оқытуды апта сайын қаланың әр бөлігінде ұйымдастыратын болады. Аталған шаралар әкімдік пен команиялар арасында жасалған меморандум аясында жүзеге асырылады.

Оқыту қорытындысы бойынша қолданушылар тест тапсырып, тегін минуттар алуға және жылдамдықты 25 км/сағ жеткізуге мүмкіндік беретін промо-код ала алады. Жол қозғалысына қатысушылардың қауіпсіздігін қамтамасыз ету мақсатында оқытудан өтпеген қолданушылар үшін максималды жылдамдық 20 км/сағ дейін шектеледі.

Даниил Капцан өзі өкілдік ететін компания халықаралық екенін айтты. Ол әлемнің 45 қаласында жұмыс істейді.

«Біздің компания қызмет көрсететін барлық қалада қателіктер қайталанады. Олардың көпшілігі, өкінішке орай, қайғылы жағдайға әкеліп жатады. Бірінші ереже – самокатқа екі адамға мінуге болмайды. Ол велосипед сияқты, белгілі бір салмаққа арналған. Екінші жиі кездесетін қателік – пайдаланушының самокатпен жолды кесіп өтуі. Жолды жаяу кесіп өту керек. Жаяу жүргіншілер өткелінде самокаттан түскен абзал. Бұл пайдаланушының өмірі мен денсаулығы үшін өте маңызды», - деді ол.

Сондай-ақ Даниил Капцан электрлі самокат мектебі маусымның соңына дейін – күн суытқанға дейін жұмыс істейтінін айтты. Алматыда – желтоқсан, елордада – қараша айына дейін.


Ұқсас жаңалықтар
Серіктестер жаңалықтары

Jańalyqtar

Үрдіс

MURAǴAT