Алматыда БЗЖҚ пайдасына 3 млрд теңгеден астам зейнетақы активі қайтарылды
22:25, 16 Ақпан 2023
АЛМАТЫ. ҚазАқпарат - Алматы қаласы прокуратурасының азаматтық, әкімшілік істер және атқарушылық іс жүргізу бойынша сот актілерінің заңдылығын қадағалау басқармасы «HOMEBROKER» АҚ-дан «БЖЗҚ» АҚ пайдасына 3 161 428 049 теңге мөлшерінде зейнетақы активтерін өндіріп алу шарасын қабылдады, деп хабарлайды ҚазАқпарат тілшісі.
Прокуратураның мәліметінше, атқарушылық іс жүргізу материалдарын зерделеу кезінде «HOMEBROKER» АҚ – ның борышкердің банкроттығы жолымен «БЖЗҚ» АҚ алдындағы міндеттемелерін орындаудан жалтару, кейін осы міндеттемелерді есептен шығару және дебитор-аффилиирленген компаниялардан борышты өндіріп алу жөнінде пәрменді шаралар қолданбау фактілері анықталды.
«Қала прокуратурасының тапсырмасы бойынша «БЖЗҚ» АҚ-ға «Сити Сервис Инвест Строй» ЖШС-дан аталған қаражатты өндіріп алу жолымен «HOMEBROKER» АҚ-дан берешек сомасын сот тәртібімен өндіріп алу жұмысы жүргізілді. Нәтижесінде «HOMEBROKER» АҚ-ның «БЖЗҚ» АҚ алдындағы берешегі толық көлемде өтелді»,- деп хабарлады Алматы қалалық прокуратурада.