Алматыда балабақша мәселесін шешу үшін ғимараттар сатып алынуда

АЛМАТЫ. ҚазАқпарат- Жетісу ауданында 160 орындық балабақшаның құрылысы басталды. Бұл туралы тұрғындармен кездесу барысында қала басшысы айтты, деп хабарлайды ҚазАқпарат тілшісі.

Ерболат Досаевтың сөзінше, аталған ауданда 2 балабақшаға орын тапшылығын қысқарту мақсатында күрделі жөндеу жұмыстары жүріп жатыр.

«Мектепке дейінгі ұйымдардағы орын тапшылығын қысқарту мақсатында 440 орындық 2 балабақшаның құрылыс-монтаждау және жобалау жұмыстары жүргізілуде. «Айнабұлақ-4» шағынауданында 160 орындық балабақшаның құрылысы басталды. Құрылысы келесі жылдың маусым айында аяқталады»,- деді шаһар басшысы.

Сонымен қатар, ол маусым айында жеке меншікте болған екі қабатты әкімшілік ғимарат сатып алынғанын атап өтті.

«Қазіргі уақытта 280 орындық балабақшаны күрделі жөндеу үшін жобалау-сметалық құжаттама әзірленуде. Жобалау желтоқсанда аяқталып, құрылысы 2023 жылдың бірінші тоқсанында басталады. Бұл мектепке дейінгі мекемеге Ратушный-Қазыбаев-Серіков-Рысқұлов көшелерінде тұратын балалар бара алады», – деді қала әкімі Ерболат Досаев.