Алматыда аула клубында тәрбиеленген 400 бала жаңа жылдық мерекеге қатысты
Шараға 400-ге жуық бала қатысты.
Мереке Алматы қаласы Жастар саясатын дамыту мемлекеттік қорының қолдауымен ұйымдастырылды.
«Біз жасөспірімдердің бос уақытын ұйымдастырумен айналысамыз. Біздің орталық әлеуметтік сипатқа ие. Әлеуметтік жағдайы төмен, ата-анасының қамқорлығынан айырылған балаларға көп көңіл бөлеміз», - деді қалалық Жастар саясатын дамыту мемлекеттік қорының директоры Алма Ауғанбаева.
Балалардың көңілін тапқыр Алдар Көсе, Жалмауыз кемпір, Микки Маус пен оптимист Олаф көтерді.
«Мен 8 жастамын. Аула клубына келіп жүргеніме бірнеше жыл болды. Осы жерде қоян-қолтық жекпе-жек бойынша спорт секциясына қатысамын. Сонымен қатар, халық билерін билегенді жақсы көремін. Бүгінгі шыршада лезгинка биін билеймін», - деді «Жас Динамо» тәрбиеленушісі Арэс Оганесянц.
Барлық қатысушыларға демеушілердің атынан сыйлықтар таратылды.
Алматы бойынша 5000 бала мен жасөспірімнің тәрбиесімен айналысып жүрген 40 аула клубы бар. Оның ішінде 12 клуб спорт бағытында жұмыс істейді.
Ауғанбаеваның мәлімдеуінше, барлық балалар бос уақытында пайдалы іспен айналысады. Тәрбиеленушілер шығармашылықпен, қолөнермен және спортпен шұғылданып, жарыстарда жүлделі орындарға қол жеткізіп жүр.
