Алматыда 367 ШОБ субьектілері тексеруден босатылды

АЛМАТЫ. ҚазАқпарат - Алматыда 367 ШОБ субьектілері тексеруден босатылды. Бұл туралы бүгін қалалық ТЖД мемлекеттік өрт бақылау бөлімінің бас маманы Басқанбаев Ардақ мәлім етті.

«Мемлекет басшысының 27 ақпандағы №757 Жарлығына сәйкес Алматы қалалық ТЖД биылғы жылдың бірінші жартысында 367 ШОБ субьектісін тексеруден босату туралы шешім шығарды. Сөйтіп 2014 жылдың басынан бері тексеру жоспарланған субьектілер тексеруден босатылды», - деді Басқанбаев Ардақ.

Маманның айтуынша, 2014 жылдың 9-сәуірінде қалалық ТЖД мен кәсіпкерлер палатасы ШОБ нысандарын тексеруден босату туралы ортақ меморандумға қол қойған болатын. Осының аясында қалалық ТЖД Елбасының Жарлығын жүзеге асыру бойынша өткізілетін шаралар жоспарын құрған.