Алматы зертханалық қызметінен үлгі алуға болады – ҚР Денсаулық сақтау вице-министрі

АЛМАТЫ. ҚазАқпарат – Бүгін брифинг барысында ҚР Денсаулық сақтау вице-министрі Қамалжан Надыров мегаполистегі зертханалар жұмысының нәтижелігін атап өтті, деп хабарлайды ҚазАқпарат тілшісі.

Елдегі төтенше жағдайға байланысты Денсаулық сақтау министрі Е. Біртановтың тапсырмасы бойынша бүкіл ел аумағында мониторингтік топтар жұмыс істейді.

Мониторингтің мақсаты – мемлекеттік бас санитарлық дәрігері тапсырмаларының медициналық ұйымдарда орындалуын бағалау және бақылау. Атап айтқанда, COVID-19 қарсы күрес бойынша алдын алу шараларын сақтауда қала ішіндегі науқастар легін бөлу алгоритмі; медициналық ұйым ішінде науқастар легін бөлу алгоритмі; жеке қорғану құралдарын пайдалану және оны жою ережесі, сондай-ақ маңызды шаралардың міндетті түрде орындалуын сақтау.

«Бүгінгі таңда ел аумағында 5-6 мыңға жуық тест жүргізіледі. Осы орайда Алматы қаласындағы зертханалық қызметтің жұмысын ерекше атап өткім келеді. Қазіргі таңда олардың қызметін үлгі тұтарлық десек болады. Алматыда мыңға жуық тесттер жүргізіледі. Бұл – зертхананың жұмысына және осы шараға қатысатын медицина қызметкерлеріне ауыр жүктеме», — деді Қ. Надыров.