Алматы тұрғыны WhatsApp-та жолаушыларды тегін тасымалдау үшін топ ашты
Бұл туралы ол өзінің Facebook парақшасына жазды. Бір айта кетерлігі, алматылықтың бұл ойын құптайтындар баршылық болып шықты. Себебі оның WhatsApp-та құрған тобы толып қалғандықтан, ол Телеграм желісіне ауысқан.
«Мен жүргізушілер мен жаяу жүргіншілерді біріктіретін топ ашамын деп шештім.
Топтың мақсаты: Мүмкіндігінше жаяу жүргіншілерді тасымалдау. Жүргізуші өзімен бағыты бір жолаушыны кезіктірсе, жолдан алып кетеді. Ең басты шарт: Тегін тасымалдау.
Бұл ойдың сәтсіздікке ұшырауы да мүмкін. Бірақ азаматтық жауапкершілігі жоғары жандардың көп екенін білемін. Маған дейін де мұндай әрекеттер болған шығар. Бірақ қайтадан бастауға не кедергі? Бәріміз бір-бірімізге бауырмыз, адамдарға қол ұшын созуға міндеттіміз. Топқа жаяу жүргіншілер ғана емес, жүргізушілер де тіркелуі қажет. Әйтпесе, бізді таситын адам жоқ», - деп жазады ол.
Сондай-ақ Тимур Whatsapp тобы толып кеткендіктен, Телеграм желісіне ауысқандығын, себебі онда қатысушыларға еш шектеу жоқ екендігін жазған.