Алматы тұрғындарына мемлекеттік марапаттар тапсырылды

None
None
АЛМАТЫ. ҚазАқпарат - Алматы әкімі Бақытжан Сағынтаев Мемлекет басшысының атынан Тәуелсіздік күніне орай мемлекеттік марапаттарды тапсырды, деп хабарлайды ҚазАқпарат тілшісі.

Жоғары наградалармен марапатталғандардың арасында дәрігер, мұғалім, қоғам қайраткер, шығармашылық және ғылыми зиялы қауым өкілдері бар. Тәуелсіздік күніне орай Алматы қаласының 76 тұрғыны марапатқа ие болды.

Салтанатты жиынға қатысушылар алдында сөйлеген сөзінде Алматы қаласының әкімі Бақытжан Сағынтаев Тәуелсіздіктің құнды мереке екенін атап өтті.

«Бүгінгі Қазақстан – табысты, қарқынды дамып келе жатқан мемлекет, ал біздің қаламыз Алматы – Тәуелсіздіктің алтын бесігі. Тәуелсіздік жылнамасында алматылықтардың да үлесі бар екенін мақтанышпен айта аламыз. Осы уақыт ішінде біз маңызды жетістіктерге қол жеткіздік. Алматы бизнес пен жеке капитал шоғырланған қалаға айналып, ел экономикасының бестен бір бөлігін және республикалық бюджеттің үштен бір бөлігін құрады. Осы жетістіктердің барлығы - мемлекет және қоғам қайраткерлерінің, ғылым мен білім, мәдениет және спорт, денсаулық сақтау, азаматтық қоғам, мемлекеттік қызметшілер және әлеуметтік қорғау, энергетика, коммуналдық шаруашылық, кәсіпкерлік өкілдерінің еңбегі. Бүгін сіздердің еліміз бен мегаполистің дамуына қосқан үлестеріңіз жоғары мемлекеттік наградалармен лайықты түрде марапатталды», - деді Алматы әкімі Б. Сағынтаев.

II дәрежелі «Достық» орденімен Қазақстан-Франция Іскерлік кеңесінің тең төрағасы А. Кәрібжанов марапатталды.

«Құрмет» орденіне 11 алматылық ие болды, олардың арасында №5 емхана бас дәрігерінің орынбасары А. Әбдрахманова, еңбек ардагері З. Ахметова, №169 мектеп-лицейдің директоры Г. Бекенова, Онкология және радиология институтының директоры Д. Қайдарова, «Қазақ әдебиеті» газетінің бас редакторы Д. Қуат, композитор,«Қазақ авторлар қоғамы» РҚБ төрағасы Б. Қыдырбек және басқалары бар.

III дәрежелі «Еңбек Даңқы» орденімен «Алматы Электротранс» ЖШС троллейбус жүргізушісі Р. Қалмұхамбетовтің, «Алматыметроқұрылыс» АҚ тау-кен шебері Т. Қоңыратовтың, «Конкрит Продактс» ЖШС бетон бұйымдары цехының шебері А. Синишиннің еңбегі еленді.

Бірқатар тұрғын «Ерен еңбегі үшін» медалімен марапатталды. Олардың арасында №83 гимназияның физика пәнінің мұғалімі Л. Аратай, «Алматының ЭлектроЩит зауыты» ЖШС директоры М. Аумолдаев, «Балалар мен жасөспірімдердің кешенді №5 мамандандырылған спорт-техникалық мектебі» МКҚК аға жаттықтырушысы К. Ещенко бар.

«Шапағат» медалімен «Перинатология және балалар кардиохирургиясы орталығы» МҚК директоры Г. Бодықовтың, «Орталық қалалық клиникалық аурухана» МҚК-ның соматика бөлімінің аға медбикесі Р. Омарованың, «№1 қалалық перзентхана» МҚК-ның акушер-гинекологы П. Садықованың, «Қазақ онкология және радиология ғылыми-зерттеу институты» АҚ бөлім басшысы И. Хусаинованың және басқаларының еңбектері аталып өтті.

Бұлардан өзге, еріктілер, медициналық-коммуналдық мекемелердің қызметкерлері Қазақстан Республикасының және Мемлекет басшысының Құрмет грамоталарымен марапатталды.


Соңғы жаңалықтар