Алматы облысының үздік ауданы автокөлік жеңіп алды
Салтанатты шара басында қонақтар мен көрермендерге безендірулермен және неонды жарықтармен көмкерілген Қазақ хандығынан басталып, Тәуелсіздіктің 25 жылдығына дейінгі уақыт аралығында болған оқиғаларымен тарихта елеулі орын алатын сәттерден сахналық қойылым көрсетілді.
Осыдан кейін облыс әкімі аудан, қалалардың мәдениет саласын дамытуда атқарған еңбектері мен жетістіктері үшін алғысын білдіріп, жиналған халыққа жалпы Алматы облысының ағымдағы жылы мәдениет саласында қол жеткізген жетістіктері туралы қысқаша баяндап берді. 
Сөз соңында өңір басшысы мәдениет күндерін жоғары деңгейде өткізіп, мәдени-көпшілік шаралары мен мәдениет саласын қолдаудағы ерекше үлесі үшін Қарасай ауданынан өзге барлық 15 аудан және 2 қаласының әрқайсысына Алғыс хат пен 500 000 теңгенің сертификатын табыстады. Ал Қарасай ауданы мәдениет саласындағы көрсеткіштері бойынша «2016 жылдың үздік ауданы» атанып, бас жүлде «Лада Ларгус» автокөлігіне ие болды.
Шара соңы жетісулық өнер ұжымдарының концерттік бағдарламасымен жалғасты.
