Алматы облысының Райымбек ауданында ешқандай торнадо соққан жоқ - әкімдік

ТАЛДЫҚОРҒАН. ҚазАқпарат - Алматы облысының Райымбек ауданында алапат құйын соқпаған. Әлеуметтік желіде тарап жатқан осындай видеоға қатысты аудан әкімдігі түсінік берді, деп хабарлайды ҚазАқпарат тілшісі.

Райымбек ауданы әкімінің баспасөз қызметі таратқан мәлімет бойынша, бұл видео монтаждалған. Ал кадр соңындағы құлаған ағаштар суреті Райымбек ауданында былтыр соққан қатты дауыл салдарынан болған.

«2020 жылдың 3 шілдесінде кешкі 17:00 шамасында ауданға қарасты Ойқарағай орманында дауыл желден 32,7 текше метр Жатаған шырша (Шренк шыршасы) құлаған. Қазіргі таңда заңға сәйкес ондағы құлаған ағаштарды кесу жұмыстары жүріп жатыр», - деп мәлім етті аудан әкімінің баспасөз қызметінен.