Алматы облысының полиция ғимаратын «бомбалаған» ер адам ұсталды
2022 жылғы 17 тамыз 21:05

Алматы облысының полиция ғимаратын «бомбалаған» ер адам ұсталды

ТАЛДЫҚОРҒАН. ҚазАқпарат - Талдықорғанда полиция ғимаратына бомба қойылғаны туралы жалған ақпарат берген ер адам ұсталды, деп хабарлайды ҚазАқпарат Polisia.kz сайтына сілтеме жасап.

«16 тамыз күні Талдықорғанның «102» шұғыл желісіне облыстық Полиция департаментінің ғимаратына жарылғыш зат қойылғаны туралы хабарлама түсті. Дабыл бойынша әрекет еткен саперлер, кинологтар және әртүрлі мамандар барлық бөлмелерді, сонымен қатар жақын орналасқан аумақты тексерді. Хабарлама жалған болып шықты.

Осы аралықта жедел бөлімшелердің қызметкерлері жалған террористі шұғыл анықтап, ұстап, оны қалалық полицияға жеткізді», - делінген полиция мәліметінде.

Ұсталған күдікті Талдықорған қаласының 44 жастағы тұрғыны. Ол жасаған ісіне өкінетінін айтып, қала тұрғындарынан мұндай әзілі үшін кешірім сұрады. «Мас болып, бомба туралы хабарладым. Мас күйімдегі әрекетім үшін заң алдында жауап беруім керек», – деді ұсталған ер адам.
Полицейлер терроризм актісі туралы көрінеу жалған хабарлағандар қылмыстық жауапкершілікке тартылатынын еске салады. Қолданыстағы заңнамада ірі көлемде ақшалай айыппұл, бас бостандығын шектеу немесе бес жылға дейін бостандығынан айыру түріндегі жаза көзделген.



Фото: polisia.kz





Ұқсас жаңалықтар
Серіктестер жаңалықтары

Jańalyqtar

Үрдіс

MURAǴAT