Алматы облысының бас санитарлық дәрігеріне қатаң сөгіс беру ұсынылды

ТАЛДЫҚОРҒАН. ҚазАқпарат - Кәсіпкерлерге «басымды қатырмаңдар» деген Алматы облысының бас санитарлық дәрігеріне қатаң сөгіс беру ұсынылды. Енді әдеп кеңесінің бұл ұсынысына байланысты шешімді Денсаулық сақтау министрі Алексей Цой қабылдайды, деп хабарлайды ҚазАқпарат тілшісі.

Жаңа ғана Талдықорғанда Алматы облыстық бас санитарлық дәрігердің ісі әдеп кеңесінде қаралды.

Президент Әкімшілігі және Денсаулық сақтау министрлігі тарапынан Ерғали Сыдымановтың халықпен дөрекі сөйлескен әрекеті бойынша істі қарау тапсырылғанын әдеп кеңесінің төрағасы Ляззат Мұқатайқызы жеткізді.

Кеңес мүшелерінің барлығы Ерғали Сыдымановтың әрекетін талқылап, мемлекеттік қызметші этикасын сақтамағаны үшін қатаң сөгіс беруді ұсынды.

Ендігі кезекте бұл ұсынысты Денсаулық сақтау министрі қарайтын болады.

Естеріңізге сала кетейік, Ерғали Сыдымановтың кәсіпкерлерге «басымды қатырмаңдар» деген бейнежазбасы желіге тарап, әлеуметтік желі қолданушыларының наразылығын тудырған болатын.