Алматы облысының әкімі жетісулық жастармен бірге ән салды

2017 жылғы 20 шілде, 09:28
Алматы облысының әкімі жетісулық жастармен бірге ән салды

АСТАНА. ҚазАқпарат -Алматы облысының әкімі Амандық Баталов ғылыми жобалары грантқа лайықты деп табылған жастармен кездесті.

Кездесу барысында Алматы облысының жас өкілі Мағжан Ысқақов голландиялық əдіспен жасалған биологиялық жемнің маңызы туралы жобасын əзірлегені үшін 2 млн. 600 мың теңге, жас ағашты тамырландыратын құнарлы қондырғы жасау жобасы үшін Берліғожа Жігер 800 мың теңге, электр үнемдегіш электр пеші жобасын дайындаған Шыңғыс Нұрғожаев 700 мың теңге грантқа ие болғандығы айтылды.

Марапатталғандар арасында жетісулық жастардың қымыз өндірісіне, тоспа суды тазартуға қатысты жобалары да бар. Бұл туралы бүгін Алматы облысының əкімі Амандық Баталовтың өңір жастарымен кездесуі барысында белгілі болды, деп хабарлайды облыс әкімінің баспасөз қызметі.

Атап өтсек, облыс əкімдігі бес жылдан бері жастар арасында «VIP» ғылыми жобаларының байқауын өткізіп келеді. Байқаудың мақсаты - жастарды инновациялық жобалар дайындауға тарту, жас ғалымдарды ынталандыру, əлеуметтік маңызы зор озық жобаларға қолдау көрсету. Бұл байқау биыл да жалғасын тауып, жеңімпаз атанған бес жас ғалымдарға гранттар Талғар ауданындағы «Лесная сказка» туристік кешенінде өткен кездесуде табысталды.

Кездесуге жалпы саны жүзге жуық жас қатысты. Шақырылғандар қатарында жас ғалымдар, спортшылар, көпбалалы жас отбасылардың мүшелері, «Жас отау» байқауының жеңімпаздары, жас кәсіпкерлер және басқа да белсенді жастар бар.

Жастармен еркін пікір алмасқан облыс əкімі Амандық Баталов өңірде атқарылып жатқан жұмыстардың басым бағыттары туралы айтып берді. Сонымен қатар әкім сөзінде мемлекеттік жастар саясатын жүзеге асыру барысына тоқталып, «Жұмыспен қамту жол картасы - 2020», «Бизнестің жол картасы - 2020», «Дипломмен - ауылға!», «Болашақ», «Серпін - 2050», «Жасыл ел» сияқты жобалардың жастар үшін үлкен мүмкіндіктерге жол ашып отырғанын айтты.

«Мемлекет басшысы жастар мəселесіне ерекше назар аударады. Біздің алдымызға қойып отырған үлкен міндеттердің бірі де - осы жастар саясатын нəтижелі жүзеге асыру. Жас өркеннің оқуына, жұмыс істеуіне жағдай жасау, бастамаларын қолдау, бағыт көрсету - біздің парызымыз. Бүгінгі кездесуде өздеріңмен еркін əңгімелесіп, ой бөліссек деген ниеттемін. Араларыңда ел есімін ерекше мақтанышпен айтатын мықты жастар көп. Сендердің тың ойларың, жалын жүректерің, жігерлі істерің мемлекетіміз үшін аса қажет, - деді А. Баталов.

Бұдан əрі өңір басшысы əлеуметтік-экономикалық даму мəселелерімен қатар жастардың мамандық таңдау, бала тəрбиесі секілді еркін тақырыптағы сауалдарына жауап берді. Жастар тарапынан ауылдық жерлерде аула клубтарын дамыту, облыс орталығында мюзикл театрын құру сияқты бірқатар ұсыныстар айтылып, ұсыныстар қолдау тапты.

Кездесу соңында А. Баталов жастармен бірге əн салып, естелік суретке түсті. Сөзінің қорытындысында облыс басшысы əрдайым белсенді жастарға қолдау көрсетіп, маргиналды жастарды қоғамдық ортаға тартуға жағдай жасайтындығын айтты. Жəне осындай кездесуді жыл сайын дəстүрлі түрде өткізу ұйғарылып, келесі жүздесу Талдықорған өңіріндегі Қора шатқалында, Бұрханбұлақ сарқырамасы маңында ұйымдастырылатын болды. Кездесуден кейін жастар командалары арасында волейболдан жолдастық кездесу өтті.

Жалпы Алматы облысында 4 мыңнан астам жас бар, яғни олар халықтың үштен бір бөлігін құрап отыр. Осыдан үш жыл бұрын облыстық жастар саясаты басқармасының бюджеті 70 млн. теңге көлемінде болса, биыл бұл көрсеткіш 550 млн. теңгеге жетті. Осы жылы жастардың əлеуметтік маңызды жобаларының байқауына 31 млн. теңге бөлінген. Сондай-ақ Халықаралық қайта құру жəне даму банкі мен ҚР Білім жəне ғылым министрлігінің жастар корпусын дамыту бірлескен жобасын жүзеге асыру шеңберінде облыс жастарының 233 жобасы грант ұтып алды.

Серіктестер жаңалықтары

Jańalyqtar