Алматы облысының әкімі жетістікке жеткен өңір жастарымен кездесті

ТАЛДЫҚОРҒАН. ҚазАқпарат - Бүгін Алматы облысының әкімі Амандық Баталов биылғы жылы үлкен жетістікке жеткен, айтулы шараларда жүлдеге ие болған жас дарындарды қабылдады. Олардың қатарында мемлекеттік «Дарын» жастар сыйлығының, халықаралық «Рух», «Алтын домбыра», «Мен қазақпын» және басқа да байқаулардың жеңімпаздары бар, деп хабарлайды ҚазАқпарат  облыс әкімінің баспасөз қызметіне сілтеме жасап.

Кездесу барысында өңір басшысы облыста жыл ішінде атқарылған шаралар, қолға алынып жатқан іргелі жобалар туралы айтып берді. Сонымен қатар «Рухани жаңғыру» бағдарламасының жүзеге асыру барысына тоқталып өтті.

«Жаңа жылды қарсы алып, өткен жылдағы жұмысты қорытындылар шақта сіздермен кездесіп отырғаныма қуаныштымын. Жалпы бұл жыл облыс үшін жақсы жаңалықтарға толы болды. Біз үшін әлеуметтік-экономикалық дамумен қатар қоғамның рухани дамуы да аса маңызды.  Сіздердің әрқайсыларыңыз осы жылы өз салаларыңызда үлкен жетістіктерге жетіп, жоғары марапаттарға ие болдыңыздар, түрлі республикалық, халықаралық конкурстарда жеңіске жеттіңіздер. Сіздерді тағы да өз атымнан және Жетісу жұртшылығының атынан құттықтаймын», - деді Амандық Баталов.

Кездесуге қатысушылар өздеріне қолдау білдіргені және өңірде мәдениет пен өнердің дамуына барлық жағдайды жасап отырғаны үшін облыс әкіміне ризашылықтарын білдірді. Мемлекеттік «Дарын» жастар сыйлығының иегері, жас ғалым Елдос Тоқтарбай биылғы жылы облыс әкімдігінің қолдауымен бірқатар жастардың кітаптары жарық көргенін, бұл өз кезегінде әдебиетті қолдауға жасалған зор қамқорлық екенін атап өтті.

Басқосуда жас өнерпаздар өздерінің болашақ жоспарлары жайында баяндады және ұсыныстары облыс басшылығы тарапынан қолдау тапты.

А. Баталов кездесу соңында қоғамдық сананы жаңғырту бір жылдың жұмысы емес екенін, оған зиялы қауымның жас өкілдері де үлес қосуы тиіс екенін атап өтті. Жас дарындарға шығармашылық табыс тілеп, жетістіктерге жете берулеріне тілектестігін білдірді.