Алматы облысындағы Еркін ауылының тұрғындары балаларының біліміне алаңдаулы
2017 жылғы 15 наурыз 13:00

Алматы облысындағы Еркін ауылының тұрғындары балаларының біліміне алаңдаулы

ТАЛДЫҚОРҒАН. ҚазАқпарат - Алматы облысындағы Сарқан ауданына қарасты Еркін ауылының тұрғындары балаларының біліміне алаңдаулы. Себебі, көрші ауылға барып қатынап оқитын жоғары сынып оқушылары сабақтан жиі қалады екен. Өйткені балаларды таситын жөнді көлік жоқ, деп хабарлайды ҚазАқпарат тілшісі.

Амалдары таусылған ата-аналар балалары үшін бүкіл ауыл болып қаражат жинап, көлік сатып алған. Алайда, оның өзі қайта-қайта сынып, жолдан қалдырды дейді көпшілік. Жалпы Еркін ауылынан 20 ға жуық оқушысы Қарабөгет ауылына барып, білім алуда. Себебі, аталған елді мекенде тек бастауыш сыныбы ғана бар.

«Балаларымыз жиі сабақтан қалады. Білімдеріне қатты алаңдаймыз. Мектепке тасуға негізі екі көлік берді. Бірақ екеуі де ескі. Жүргенінен тұрғаны көп. Қазір бұзылып жүргізушінің ауласында тұр. Ауыл болып ақша жинап, көлік сатып алдық. Оның өзі де ескі», - дейді ауыл тұрғыны Құдайберген Жұмағалиев.

«Бәріміз жабылып қыста суықта итереміз. Іші өте суық. Және есігі дұрыс жабылмайды. Ашылып қала береді», - дейді 10 сынып оқушысы Балнұр Қасымханова.

Ал, Сарқан ауданы әкімінің орынбасары Марат Разбеков Еркін ауылы тұрғындарының жағдайынан хабарсыз болып шықты. Көпшіліктің өз еріктерімен көлік сатып алғандығы шенеунікті таңғалдырды. Енді әкім орынбасары аталған мәселенің мән-жайын анықтап, тексереміз деп отыр. Қажет болған жағдайда мәселені шешіп береміз деп уәде берді.

1

2

3

4

Jańalyqtar

MURAǴAT