Алматы облысында полицияның қару-жарақ қоймасынан ұрланған 6 тапанша табылды
«26 мамыр күні Алматы облысы прокуратурасының бастамасымен жүргізілген арнайы операция барысында тәртіп сақшылары қаңтар айындағы тәртіпсіздіктер кезінде құқық қорғау органдарының қару-жарақ қоймаларынан ұрланған 18 оғы бар 6 «Макаров» тапаншасын, сондай-ақ 1 Калашников автоматын тауып, тәркіледі.
Осылайша, жедел-іздестіру іс-шараларының нәтижесінде 2 күдіктінің тұрғылықты жері бойынша аталған қару түрлері табылды»,- деп хабарлады Алматы облыстық прокуратурасының баспасөз қызметі.
Ведомствоның ақпаратына сәйкес, күдіктілер ұсталды. Олардың үстінен ҚР ҚК 287-бабы 3-бөлігі (қаруды, оқ-дәрілерді, жарылғыш заттарды және жарылғыш құрылғыларды заңсыз сатып алу, беру, өткізу, сақтау, тасымалдау немесе алып жүру) бойынша сотқа дейінгі тергеу басталды. Сотқа дейінгі тергеу шеңберінде істің барлық мән-жайын анықтауға бағытталған жедел-тергеу іс-шаралары жүріп жатыр, сондай-ақ ұсталғандар басқа қылмыстарға қатыстылығы бойынша тексерілуде.
Өзге ақпарат тергеу мүддесі үшін жария етілмей отыр.