Алматы облысында көз жұмған науқаста менингит расталмады
«Бұдан бұрын жыл басынан бері республикада 13 өлім болғаны мәлімделген еді. 13 маусым сағат 09:00-дегі жағдай бойынша, зертханалық зерттеулер нәтижесінде Алматы облысында қайтыс болған бір адамда менингококк инфекциясы расталмады», - делінген хабарламада.
Ведомстводан мәлім еткендей, Қазақстанда 2018 жылдың басынан менингококк инфекциясының 59 жағдайы тіркелген. Оның ішінде 14 жасқа дейінгі балалар арасында - 21 жағдай анықталып, оның 12-сі өліммен аяқталды (Алматы қаласында - 6 жағдай, Алматы облысында - 3 жағдай, Оңтүстік Қазақстан облысында - 2 жағдай және Қызылорда облысында - 1 жағдай).
«Жағдай Денсаулық сақтау министрлігінің бақылауында тұр», - делінген таратылған ақпаратта.
Аурудың алғашқы симптомдары (тамақ қызару, дене қызуының көтерілуі, бастың ауыруы, әлсіздік) пайда болған кезде дереу дәрігерлерге жүгініп, нұсқауларды мұқият орындау қажет.
Әртүрлі көпшілік мәдени шараларға қатысуды, жүзу бассейндеріне, сауда, ойын-сауық орталықтарына баруды шектеп, жеке гигиенаны сақтау керек.
Жұмыс орындарында бөлмелерді жиі желдетіп, ылғалды тазалық жұмыстарын жүргізіп отырған абзал. Тек қайнаған немесе бөтелкедегі суды қолдану қажет. Тоңу, ашығу, ұйқының қанбауы секілді жайларды болдырмауға тырысу керек.
Аурып ем іздегеннен, оның алдын алу әлдеқайда жеңіл екендігін есте сақтаған жөн.