Алматы облысында кез-келген адам тегін азық-түлік ала алатын сөре ашылды
«Жан жылуы мекені» деп аталатын жерде дастарханға аса қажеттінің бәрі бар. Жетісу жерінің іскер әйелдері қолға алған қайырымды шараның басты мақсаты адамдардың бір-біріне жылу сыйлап, мұқтаж жанға қол ұшын беру, - деп хабарлайды ҚазАқпарат тілшісі.
Текелі қаласының тұрғыны Дана Өскенбаева бес баланың анасы. Кішкентайының күтімімен үйде отырған ол, алатын жәрдемақысының азық-түліктен артылмайтынын айтады. Ал қымбатшылық қысқан заманда дүкен ішінен ашылған сөредегі тауар халыққа нағыз көмек деп санайды.
«Ай сайын өз басым 70 мың теңгеден аса қаражатты азық-түлікке жұмсаймын. Осы жерден тегін қант, кеспе, шәй алдым. Бұл бізге үлкен көмек. Осыны ұйымдастырып отырған адамдарға алғысымды айтамын»,- деді Дана Өскенбаева.
Ұйымдастырушылар «жан жылуы мекені» деп аталатын сөреге кез келген адам өз үлесін қоса алатынын айтады. Яғни, дүкенге келген жан сатып алған затын осы сөреге қалдыруға болады. Ал шараның негізгі мақсаты мұқтаж жандарға қамқорлық көрсету.
«Бір-бірімізге көмек көрсету басты мақсатымыз. Әр қазағым жалғызым дейді. Тек қана бақуатты адамдар ғана мейірімділік көрсете алмайды, бәрі көрсету керек. Екі шоколад алып, бір шоколадты осында қойып, бір шоколадты өзі жесе ол балаларға үлкен тәрбие деп ойлаймын»,- деді Алматы облыстық іскер әйелдер кеңесінің мүшесі Алмагүл Оңғарбаева.
Алматы облысының іскер әйелдері тегін азық-түлік сөресін әзірге нан, қант, кеспе, шәй сияқты дастарханға ең қажетті өнімдермен толтырған. Ал алдағы уақытта мұндай сөрелерді Алматы облысының барлық өңірлерінде ашсақ деген жоспарлары бар және оның ішіндегі тауарларды да түрлендіре түспек.