Алматы облысында белсендіні атты деген күдікпен ауыл әкімі және оның жүргізушісі ұсталды

ТАЛДЫҚОРҒАН. ҚазАқпарат – Алматы облысында қоғам белсендісі Галина Арзамасоваға оқ атты деген күдікпен ауыл әкімі мен оның көлік жүргізушісі ұсталды. Қазір екеуі де уақытша ұстау изоляторына қамауға алынды, деп хабарлайды ҚазАқпарат тілшісі.

Алматы облыстық Полиция департаменті баспасөз қызметінің мәліметінше, ұсталған күдікті Талғар ауданына қарасты Панфилов ауылдық округінің әкімі Нұрғали Аппазов пен оның көлік жүргізушісі Ғани Сманов.

Қазір күдіктілердің үстінен үстінен бұзақылық бабы бойынша қылмыстық іс қозғалып, тергеу ҚР ҚК 293-бабының 3-бөлігіне сәйкес жүргізіліп жатыр.

Естеріңізге сала кетейік, 26 тамыз күні қоғам белсендісі Галина Арзамасоваға Талғар қаласындағы әкімдік ғимаратының тура жанында белгісіз біреулер оқ атқан. Артынша жәбірленуші Алматы қаласының ауруханасына жеткізілді. Аталған факті бойынша сотқа дейінгі тергеу жүргізіліп жатыр.