00:36, 05 Қараша 2019 | GMT +6
Алматы облысында 16 жастағы аяғы ауыр бойжеткен көлік апатына түсті
ТАЛДЫҚОРҒАН. ҚазАқпарат - Алматы облысында 16 жастағы бойжеткен көлік апатына түсті. Ол Талғар аудандық ауруханасына жеткізілді, деп хабарлайды ҚазАқпарат тілшісі.
«2003 жылы туған науқастың жағдайы қанағаттанарлық. Ол жүктіліктің 2-3 аптасында. Дәрігерлердің қарауынан кейін, ауруханаға жатудан бас тартты. Амбулаториялық жағдайда ем қабылдайтын болады», - деді Алматы облыстық Денсаулық сақтау департаменті баспасөз қызметінің өкілі Ләйлім Әубәкірова.
Алдын-ала мәлімет бойынша, Қызыл Қайрат аулынан шыға берісте жедел жәрдем көлігі жол талғамайтын автокөлікпен соқтығысқан. Оқиғаның мән-жайы анықталып жатқандықтан, аяғы ауыр бойжеткеннің нақты қай көлікте болғаны әзірге белгісіз.
Куәгерлердің айтуынша, бұл аймақта көлік апаты жиі болып тұрады. Мұның себебі - ескерту белгілерінің жоқтығы және кептелістердің салдарынан жүргізушілер қарсы бағытқа шығып кетеді екен.