Алматы декларациясының ұсыныстары нәтижесінде адам денсаулығы айтарлықтай жақсарды - Т. Шарманов

АЛМАТЫ. 13 мамыр. ҚазАқпарат - Дүниежүзілік денсаулық сақтау бағдарламасы бойынша адамзаттың өлім-жітімінің 60 пайызы дұрыс тамақтанбауға байланысты болып отыр.

Бұл туралы бүгін Алматыда өтіп жатқан «Денсаулық баршаға: созылмалы сырқаттар. Мәселелер. Шешу жолдары» ІІ Халықаралық конгресінде айтылды.

«Алматы конференциясының декларациясы бойынша барлық адамның өз денсаулығын сақтауға құқығы бар. Оны қорғау мемлекеттің мойнындағы жұмыс. Конференциядағы ұсыныстарды жүзеге асыру нәтижесінде дүниежүзінде адам денсаулығы айтарлықтай жақсарды. Сондықтан бұл шараның да маңызы өте зор. Өйткені қазір аурулардың алдын алып, оны емдеуге дейін жеткізбеу мәселесі күн тәртібіне шығып отыр», - дейді ҚР ҰҒА академигі, Қазақ тағамтану академиясының және Профилактикалық медицина академиясының президенті Төрегелді Шарманов.

Т. Шарманұлының айтуынша, қазіргі медицинаның ұстанған бағыты дәлдік пен нақтылық. Науқасты ота жасауға жеткізбей, диагнозын ерте анықтап, аурудың алдын алуға ұмтылу керек. Бұл үшін дұрыс тамақтануға дағдыланып, салауатты өмір сүру салтын қалыптастыру қажет.