Алматы әуежайында жолаушылардың мазасын алған таксистер әкімшілік жазаға тартылды

АЛМАТЫ. ҚазАқпарат - Алматы әуежайында жолаушылардың мазасын алған таксистер ұсталды.

Алматы әуежайының желілік ішкі істер бөлімі хабарлағандай, 25 жастағы Алматы және 31 жастағы Алматы облысының тұрғыны кіреберістегі таксистердің әрекетіне шағымданған.
Олардың айтуынша, жеке тасымалдаушылар ғимараттың алдында алдарын кес-кестеп жүруге жол бермеген.
Полиция қызметкерлері 1977, 1980, 1982, 1993 жылдары туылған 4 азаматты ұстады.
Олар ҚР ӘқК 449-бабының 1-бөлімі, 449-бабының 2-бөлімі бойынша әкімшілік жазаға тартылды.
ҚР Көліктегі ІІД әкімшілік полиция басқармасының хабарлауынша, жыл басынан бері осындай әрекеті үшін 151 таксист жазаға тартылған, олардан 1 млн 601 мың теңге көлемінде айыппұл өндірілді.