Алматы әуежайы қаланың Орталық Азиядағы көлік-логистикалық хаб ретіндегі рөлін нығайтады

АЛМАТЫ. ҚазАқпарат – Жаңа терминал іске қосылғаннан кейін әуежай қаланың бүкіл Орталық Азиядағы көлік-логистикалық хаб ретіндегі позициясын нығайтады. Бұл туралы Алматы әкімі Ерболат Досаевтың TAV Airports Holding жаңа бас директоры Серкан Каптанмен және Алматы халықаралық әуежайы басшылығымен кездесуінде айтылды, деп хабарлайды ҚазАқпарат тілшісі.

«Алматы үшін әуежайды дамытуға бағытталған мәселелер өте маңызды. Өйткені, әуежай – қаланың әуе қақпасы әрі әуе алаңы. Расында да, қаламыздың болашақта дамуы әуежайдың жағдайына, оның инфрақұрылымына, сервис деңгейі мен ыңғайлылығына тікелей байланысты. Бізде Алматының жоғары мәртебесіне лайық барлық халықаралық стандарттарға сәйкес заманауи терминал болуы тиіс. Өз тарапымнан қаланың бұдан былай да жобаға қолдау білдіретінін растаймын», - деді Ерболат Досаев.

Әуежайдың жаңа терминалының іске қосылуы жолаушыларды өткізу қабілетін жылына 7 миллионнан 14 миллионға дейін арттырады және қаланың бүкіл Орталық Азиядағы транспорттық-логистикалық хаб ретіндегі позициясын нығайтады.

Сондай-ақ, кездесуде Алматы халықаралық әуежайының даму перспективалары мен шеберлік-жоспарларын жылдың аяғына дейін әзірлеу және нысан аумағындағы көлік инфрақұрылымын бірлесе дамыту шаралары талқыланды. Мегаполис басшысы осы құжаттың жыл аяғына дейін қабылданатын қаланың бас жоспарымен сәйкес болуы тиіс екенін атап өтті.

Фото: Алматы қаласы әкімдігінің баспасөз қызметі