Алматы әкімі нашақорлар жиналатын үйді бұзуды тапсырды

АЛМАТЫ. ҚазАқпарат - Алматы әкімі Ерболат Досаев Медеу ауданы тұрғындарымен кездесуі барысында жауапты адамдарға 2016 жылы бұрын өртеніп кеткен үйді бұзуды тапсырды, деп хабарлайды ҚазАқпарат тілшісі.

Ерболат Досаевпен кездесуге арнайы келген Медеу ауданының тұрғыны осыдан 6 жыл бұрын өртеніп, қаңырап бос тұрған үй мәселесін көтерді.
Оның айтуынша, ол жер үй-күйсіз жүргендердің түнеп, нашақорлардың жиналатын орынға айналған.
«Черкасская оборона, 13 мекенжайындағы үй 2016 жылдың қазан айында өртеніп кетті. Тұрғындарды басқа жаққа көшірді. Ал үй болса, қаңырап бос қалды. Аумақтан бірнеше рет мәйіт табылды және 12 рет өрт шықты. Мен Сізден сұрайтыным сол үйді сүріп тастаңыздаршы»,- деді тұрғын.
Алматы әкімдігінің Күрделі құрылыс кәсіпорнының өкілі инвесторлар іздестіріліп жатқанын айтты.
Ерболат Досаев, дереу нысанды бұзуды қолға алуды тапсырды.
«Күрделі құрылыс кәсіпорнының есебінен өздерің бұзуларың керек. Қаражат бар ғой? Бұзыңдар, сосын инвестор іздеңдер», - деді қала әкімі.

Фото: shutterstock.com