Әлімжан Құртаев «Самұрық-Қазынаға» еншілес компаниясының пайдасыздығы туралы айтты

НҰР-СҰЛТАН. ҚазАқпарат - Дұрыс ұйымдастырылған тәсіл кезінде химия өнеркәсібі Қазақстан экономикасын дамытудың драйверіне айналуы мүмкін. Депутат Әлімжан Құртаев Сенаттың жалпы отырысындағы Үкімет басшысы Әлихан Смайыловтың атына жолдаған сауалында осындай пікір білдірді, деп хабарлайды ҚазАқпарат тілшісі.

Сенатор химия саласындағы жобаларды басқару тиімділігінің төмен деңгейін атап өтті. Депутат өз дәлелдерін нақты фактілермен бекітті. Мысалы, 2009 жылы «Самұрық-Қазына» Қоры «Біріккен химиялық компания» ЖШС құрды. Оның қызметінің негізгі мақсаты - капиталға қатысу арқылы Қазақстанда жаңа химия өндірістерінің дамуына жәрдемдесу. Бұл компанияның жұмысы үшін қомақты қаржы бөлінді, оның басым бөлігі - Ұлттық қордан.

Сенатор атап өткендей, осы ЖШС қызметінің барлық кезеңінде жоспарланған 21 жобаның тек 6 жобасы іске асырылды, бірақ олар да толық көлемде жұмыс істемейді.

«Химия саласындағы жобаларды басқару тиімділігі төмен деңгейде. Бұл салада тиісті мемлекеттік органдармен үйлестіру шаралары мен жүйелі жұмыс жоқ. Бүгін химия өнеркәсібіне терең, сапалы талдау жасап, нақты бағыттарды анықтайтын уақыт келді. Осы саладағы барлық инвестициялық жобалар мұқият іріктелуі тиіс», - деді Әлімжан Құртаев.

Депутат «Біріккен химиялық компания» ЖШС-нің одан әрі жұмыс істеуінің орындылығын қарастыруды және осы саладағы уәкілетті органдардың, ғылыми мекемелер мен қауымдастықтардың қатысуымен химия саласын дамыту жөніндегі ведомствоаралық комиссия құруды ұсынды.