Әлихан Смайылов жылу желілерін техникалық тексеруді 1 маусымға дейін аяқтауды тапсырды
«Өңір әкімдіктері Энергетика, Индустрия және инфрақұрылымдық даму министрліктерімен бірлесіп, барлық тұрғын үй-коммуналдық шаруашылығы, тұрғын үй және әлеуметтік сала объектілерінің алдағы 2023-2024 жылғы жылыту маусымына дайындығы бойынша іс-шаралар жоспарын бекітіп, оны тез арада іске асыруға кірісуі қажет», - деді Әлихан Смайылов.
Сонымен қатар, Үкімет басшысы Индустрия министрлігіне Энергетика министрлігімен және өңір әкімдерімен бірлесіп, 1 маусымға дейін қолданыстағы жылу желілерінің жағдайына техникалық тексеру жұмыстарын аяқтауы керектігін ескертті.
«Осы жұмыстардың қорытындысы бойынша апатты жағдайдағы жекеменшік жылу желілерін коммуналдық меншікке берудің қажеттілігін анықтау керек. Нәтижесін менің жеке өзіме баяндаңыздар», - деді Премьер-Министр.
Айта кетсек, Үкімет басшысы жылу электр орталықтарының басшылығы мен иелерінің жауапкершілігі төмендігін атап өткен еді.