Әлеуметтік маңызы бар азық-түлік пен көмір бағасын қадағалайтын жоба іске қосылды

НҰР-СҰЛТАН. ҚазАқпарат - Мемлекеттік кірістер комитеті әлеуметтік маңызы бар азық-түлік тауарлары және тас көмірді бақылайтын пилоттық жобаны іске қосты, деп хабарлайды ҚазАқпарат.

Оның қатысушылары арнайы ақпараттық жүйедегі электрондық шот-фактураны жазып беруі тиіс.

«Инфляцияның өсуіне, азық-түлік өнімдері мен мұнай өнімдері бағасының өсуіне жол бермеу жөніндегі шаралар аясында Премьер-Министрдің орынбасары – Қаржы министрінің бұйрығы бекітілген. Осы бұйрықпен биылғы 31 желтоқсанға дейін тізбеге сәйкес әлеуметтік маңызы бар тауарлар мен көмірді өткізу кезінде электрондық шот-фактураларды (ЭШФ) жазып беру бойынша салық төлеушілердің міндетін енгізу бөлігінде пилоттық жобаны іске асыру көзделеген. Сонымен бірге, жоғарыда көрсетілген тауарларды бөлшек саудада өткізуді жүзеге асыру кезінде жеке тұлғаларға ЭШФ жазып беру талап етілмейді», - деп мәлімдеді ведомстводан.

Айта кетейік, әлеуметтік маңызы бар азық-түлік тауарларының тізбесіне мыналар жатады: бірінші сортты бидай ұны; бірінші сортты ұннан жасалған бидай наны; рожки; қарақұмық жармасы; тазартылған күріш; картоп, асханалық сәбіз, басты пияз, ақ қауданды қырыққабат; ақ қант – құмшекер; күнбағыс майы; сиыр еті; тауық еті; майлылығы 2,5% пастерленген сүт; майлылығы 2,5% айран; сары май; тауық жұмыртқасы; аc тұзы; майлылығы 5-9% сүзбе.