Әлемде былтыр 150 мыңнан астам адам қызылша жұқтырған

АСТАНА. ҚазАқпарат – Дүниежүзілік денсаулық сақтау ұйымының деректері бойынша 2022 жылы әлемде қызылшаның 150 мыңнан астам жағдайы тіркелген, деп хабарлайды ҚазАқпарат Санитариялық-эпидемиологиялық бақылау комитетінің әлеуметтік желідегі парақшасына сілтеме жасап.

Жыл басынан бері сырқаттанушылық таяу шет елдерде – Ресейде, Қырғызстанда, Тәжікстанда, Украинада байқалды.

Қазақстанда кейінгі 5 жылда қызылшаның 2 эпидемиясы тіркелді: 2015 жылы – 2 340 жағдай, 2019 жылы – 13 326 жағдай зертханалық түрде расталды және клиникалық түрде 3 545 жағдай расталды.

Биыл Павлодар облысының аумағында қызылша бойынша эпидемиологиялық жағдай тұрақты, қызылшамен сырқаттану жағдайлары тіркелмеген, 2022 жылы вакцина алмаған балада 1 жағдай тіркелді.

Қызылша – жіті инфекциялық вирустық аса жұқпалы ауру. Қызылшаның қоздырғышы – вирус. Ауа-тамшылы жолмен таралады. Клиникасының ерекшелігі – бөртпе түрінде шығады. Қызылша вирусы ағзаға тыныс алу жолдары арқылы енеді, онда ол көбейіп, қанға енеді. Қанмен вирус әртүрлі органдарға таралады, бадамша бездерге, бауырға, өкпеге, сүйек кемігіне теріс әсер етеді. Қызылша круп (көмей стенозы), қызылша энцефалиті (мидың қабынуы), менингит (ми қабығының қабынуы), пневмония (өкпенің қабынуы) сияқты асқынулармен қауіпті. Кез келген асқынудан науқас мүгедек болып қалуы немесе қайтыс болуы мүмкін.

Қызылша ЖРА-ға ұқсас белгілерден басталады, олар – температураның көтерілуі, жөтел, мұрыннан су ағу, көзден жас ағу. Бұл жағдай 2-3 күнге созылады, содан кейін ашық қызыл бөртпе пайда болады, бастапқыда бетте, құлақтың артында, содан кейін бүкіл денеге таралады. Қызылша ауруы басқаларға бөртпе пайда болғанға дейін 4 күн және 4 күннен кейін ең жұқпалы болып табылады.

Қызылшаны емдеу қиын. Қызылшаны емдеуге арналған арнайы препарат жоқ. Антибиотиктер тек қызылшаның асқынуын емдеу үшін ұсынылады. Қызылшаға қарсы вакцинацияны жүргізу мерзімі Ұлттық егу күнтізбесінде 1 жыл және 6 жыл ретінде көрсетілген.

Қызылшаға қарсы вакцина 1963 жылы жасалды және осы аурумен күресуде тиімді екендігі дәлелденді. Біздің мемлекетіміз сатып алатын барлық вакциналар ДДҰ талаптарына сәйкес келеді, сапа сертификаты бойынша тексеруден өткен.

Белсенді иммунитетті қалыптастыру мақсатында егу күнтізбесіне сәйкес тірі вакцинамен (ҚКП) жоспарлы вакцинопрофилактика жүргізіледі, балалардың нысаналы топтарын вакцинациямен қамту кемінде 95% болуы тиіс. Барлық вакцинацияланбаған, яғни қызылшаға қарсы иммунитеті жоқ және ауырмаған адамдар қызылшамен ауыратынын есте ұстау керек.

Бүгінгі таңда өңірде вакцинациядан бас тарту мәселесі өзекті болып отыр. Вакцинациядан бас тарту арқылы адам өзін асқынулармен, өліммен аяқталуы ықтимал ауыр сырқаттарға душар етеді.