Александр Бубликтің Paris Masters турниріндегі қарсыласы анықталды

АСТАНА. ҚазАқпарат – Қазақстанның бірінші, әлемнің 38-ракеткасы Александр Бубликтің Париж мастерс турниріндегі қарсыласы анықталды, деп хабарлайды ҚазАқпарат тілшісі.

Қазақстандық теннисші алғашқы айналымда дүниежүзілік рейтингіде 76-орында тұрған швециялық Микаэль Имермен шеберлік байқасады.

М.Имер іріктеу сайыстарынан кейін негізгі турнирге жолдама алды.

А.Бублик пен М.Имердің қай жеңгені екінші айналымда әлемнің 9-ракеткасы, канадалық Феликс Оже-Альяссиммен кортқа шығады. Өткен аптада Базель (Швейцария) ATP 500 турнирінің ширек финалында А.Бублик осы теннисшіге жол берген еді. Кеше канадалық спортшы аталмыш доданың чемпионы атанды.

Париж мастерс жарысы 31 қазанда басталып, 6 қарашада аяқталады.

Еске сала кетейік, бұдан бұрын қазақстандық теннисші қатысатын WTA қорытынды турнирінің жеребесі тартылғанын жазған болатынбыз.