Александр Бублик Уимблдон турнирінің үшінші айналымына шықты
2022 жылғы 29 маусым 22:48

Александр Бублик Уимблдон турнирінің үшінші айналымына шықты

НҰР-СҰЛТАН. ҚазАқпарат – Қазақстанның бірінші, әлемнің 38-ракеткасы Александр Бублик Уимблдон турнирінің үшінші айналымына шықты, деп хабарлайды ҚазАқпарат тілшісі.

А. Бублик екінші кездесуін әлемнің 64-ракеткасы, сербиялық Душан Лайовичпен өткізді.

Осыған дейін қарсыластар бір-ақ рет жолдары тоқайласып, онда сербиялық спортшы басым түскен еді.

Бұл жолы қазақстандық теннисші 7:6 (9:7), 6:2, 7:5 есебімен жеңіске жетті.

Екі сағат 4 минутқа созылған бәсеке барысында Бублик 17 эйс жасап, 6 брейк-пойнттың тең жартысын мүлт жіберген жоқ. Лайович 2 эйспен шектеліп, бір рет те брейк жасай алмады.

А.Бублик үшінші айналымда әлемнің 23-ракеткасы, америкалық Фрэнсис Тиафомен шеберлік байқасады.

Қазақстандық спортшы жуырда Истбурн жарысында Ф.Тиафоны 5:7, 7:6 (7:4), 6:0 есебімен ұтқан болатын.

Өткен жылы Александр Уимблдонда үшінші айналымға дейін жеткен еді. Қазірдің өзінде сол үздік нәтижесін қайталап отыр.

Еске сала кетейік, бұдан бұрын Елена Рыбакинаның екінші айналымға өткенін жазған болатынбыз.

Сондай-ақ Елена Рыбакина әлемде эйс жасаудан көш бастап келеді.


Серіктестер жаңалықтары

Jańalyqtar

Үрдіс

MURAǴAT