Алдағы демалыстарда солтүстікте күн суытып, оңтүстікте жылынады

АСТАНА. ҚазАқпарат – Қазгидромет демалыс күндердегі ауа райы болжамын жариялады, деп хабарлайды ҚазАқпарат.

Демалыс күндері республиканың басым бөлігі атмосфералық фронтальды бөлімдердің ықпалында болады. Елдің батысында, солтүстігінде және шығысында қар, ал оңтүстік аймақтарда жауын-шашын жауады. Оңтүстік, таулы және тау бөктеріндегі аудандарда қатты жауын-шашын (жаңбыр, қар), тұман және көктайғақ күтіледі.

Желдің соғуы күшейеді. Елдің батысында түнде ауа температурасы 7-18, күндіз 3-8 аязға дейін аздап төмендеуі болжануда. Елдің солтүстік жартысында, орталығында және шығысында температура түнде 15-26 градус, күндіз 5-13 градус аяз болады.

Оңтүстік аймақтарда түнгі уақытта ауа температурасы плюс мәнге жетеді, күндіз 2-10° С жылы болады.