Алакөлде 20-ға жуық БАҚ өкілдері мен блогерлер бас қосты
«Шараға белгілі блогерлер, баспасөз хатшылары мен республикалық, өңірлік БАҚ өкілдері, ақпарат саласының белсенді тұлғалары қатысуда. Ақпарат саласының мамандары Елбасының «Болашаққа бағдар: Рухани жаңғыру» мақаласында айтылған бағыттарын насихаттауда қандай жаңа ақпараттық құралдарды қолдану керектігі жөнінде де өзара пікір алмасады. Жалпы шараға 20 адам қатысып жатыр», - деді облыстық өңірлік коммуникациялар қызметі директорының орынбасары Жанна Арынбекова.
Басқосуды Алматы облыстық Ішкі саясат басқармасы Елбасының «Болашаққа бағдар: Рухани жаңғыру» атты бағдарламалық мақаласы аясында ұйымдастырып отыр. Жиында Telegram-ның негізгі артықшылықтары, трендтері жөнінде қазақстандық саясаттанушы, белгілі блогер Ербол Еділов мастер-класс өткізуде.
Айта кету керек, бұл шара алғаш рет ұйымдастырылғанда Алматы облысы әкімінің орынбасары Жақсылық Омар арнайы келіп, игі бастаманың негізгі мақсаттарының бірі - айдынды Алакөлді өзге өңірлердің тұрғындарына көрсету, насихаттау екендігін атап өткен еді. Себебі шараға Атырау, Астана, Алматы қалаларынан да блогерлер келген болатын.
Сондай-ақ біліктілікті арттыруға арналған жиынға белгілі саясаттанушы Айдос Сарым қатысып, мастер-класс өткізген.