Ақтөбенің Ойыл ауданы «сары» аймаққа өтті
Өткен тәулікте Ақтөбе облысында 25 адамнан коронавирус инфекциясы анықталды. Бәрі де Ақтөбе қаласының тұрғыны. Вирус жұқтырғандардың 16-сы ауырып, дене қызуы көтеріліп, дәрігер көмегіне жүгінген. Қазіргі кезде аурушаңдықтың өсу деңгейі 0,6% құрап отыр. Бүгінге дейін барлығы 4556 жағдай тіркелсе, оның 93 пайызға жуығы жазылды. Ойыл ауданы бойынша барлығы 80 адам вирус жұқтырса, оның 29-ы симптомсыз. Бүгін бұл ауданда шектеу шарасы күшейді.
«Конференция, көрме, форум, ойын- сауық, спорттық, сондай-ақ адамдар көп жиналатын отбасылық, салтанатты, мерекелік шараларға, естелік, ас беру және басқа да басқосуға тыйым салынады. Ойын-сауық мекемелерінің (караоке, бильярд, компьютерлік клубтар, түнгі және ойын клубтары, боулинг- орталықтары, кальян), букмекерлік кеңселердің және лото-клубтардың қызметтеріне шектеу қойылған. Балабақшаларда тек кезекші топ жұмыс істейді. Білім беру мекемелеріндегі асхана өз қызметін тоқтатады», - деп хабарлады облыстық санитариялық-эпидемиологиялық бақылау департаментінің баспасөз қызметі.
Жаңа Қаулыға сәйкес балалардың түзету кабинеттері, балалар мен ересектердің білім беру орталықтарында адам саны 15-тен аспауы тиіс. Ал медициналық орталықтардың, кабинеттердің, стоматологиялардың қызметіне тек алдын ала жазылуы керек. Банк, халыққа қызмет көрсету орталығы, «Қазпочта» АҚ бөлімшесінің жұмыс уақыты сағат 09:00-ден 18:00-ге дейін шектелді. Діни объектілерде ұжымдық іс-шаралар өтпейді. Қоғамдық тамақтану орнында адам саны 50-ден аспауы тиіс.