Ақтөбедегі орталық мешіт қызметкері бас имамды сотқа берді
Дәмен Өмірбек 2011 жылдан бері «Нұр Ғасыр» орталық мешітінде жұмыс істеп келеді. 2015 жылы «Зекет» қорының заңды өкілі қызметіне ресми кірісіп, халықтан жиналған қаржы мен мүліктің 20 пайызын айлық ретінде ай сайын алып отыруға келісімшарт жасады. Жұмысында еш қиындық пен келіспеушілік болмаған қызметкер бар кедергінің бас имам Төлеби Оспан келген соң басталғанын мәлімдеп, сотқа арыз түсірді. Алғашқы тыңдалым өтіп, келесі аптада №2 қалалық сотында отырыс басталады.
«Төлеби Оспан алғаш күні-ақ «Сен маған ұнамайсың. Арыз жазып, өз еркіңмен жұмыстан шық. Астанадан наиб-имамдар келеді. Солар келгенше орныңды босат. Сенің орныңа солардың біреуін ұсынамын немесе бұл жұмысты өзім атқарамын», - деді. Кейін өз еркіммен арыз жазып кетсем, дастархан жайып, шапан жабатынын жеткізді. Мен алдымен келісіп, кабинетінен шыққан соң ойланып, бас тарттым. «Сен маған ұнамайсың» деген сөзі ар-намысыма тиіп, сотқа арыздандым», - деді Д.Өмірбек.
Мешіт қызметкері заңсыздық туралы арыз жазып, облыстық еңбек инспекциясы басқармасының басшысы М.Райымқұлов, Қазақстан мұсылмандары діни басқармасынан көмек сұраған. Бірақ ешқайсысынан жауап жоқ.
«Бұрын ай сайын орташа есеппен 34 мың теңге жалақы алған едім. 2016 жылдың мамыр айынан бастап еңбекақы берген емес. Жауапкердің заңсыз әрекеттерінен соң маған келтірілген моральдық залал мөлшерін 200 мың теңге деп бағалаймын. Сонымен қатар, 10 айдың еңбекақысын, 308 мың теңгеден астам жалақыны өндіруді сұрап отырмын. «Зекет» қорындағы жұмыстан шеттетілдім, сол қызметке қайта кіріскім келеді. Мен өндірген бар қаржыны медресеге беруді ойлап отырмын. Маған ақша емес, әділдік керек», - деді Д.Өмірбек. 