22:26, 19 Сәуір 2019 | GMT +6
Ақтөбедегі ауыл маңынан студенттің өлі денесі табылды
АҚТӨБЕ. ҚазАқпарат - Ақтөбеде Жайсаң көпсалалы колледжінің 1-курс студентінің денесі табылды, деп хабарлайды ҚазАқпарат тілшісі.
Ақтөбеде 12 сәуір күні қайғылы оқиға тіркелді. Мәртөк ауданының Жайсаң ауылы маңында 1-курс студентінің денесі табылды.
«Ата-анасының қамқорлығынсыз қалған 1999 жылы туған студент Жайсаң арнайы білім беру ұйымында тәрбиеленген. «Ақыл-ойы тежелген» диагнозымен психиатрдың есебінде тұрған және ІІ-топтағы мүгедек. Колледжде «Тігінші» мамандығы бойынша оқып, мемлекет тарапынан шәкіртақы алған», - деп хабарлады облыстық білім басқармасы.
Айта кетейік, қылмыстық іс бойынша Алға облыстық балалар үйінің түлегі, Жайсаң көпсалалы колледжінің 2-курс студенті күдікті ретінде қамауға алынды. Өңірлік коммуникация қызметінің хабарлауынша, күдікті де психиатрдың есебінде тұр. Тергеу жұмыстары аяқталғанша басқа мәліметтер жарияланбайды.