Ақтөбеде жол ережесін сақтамаған жүргізушілер 163 миллион теңге айыппұл төлейді

АҚТӨБЕ. ҚазАқпарат – Ақтөбеде «Рубеж» аппараттық-бағдарламалық кешенінің көмегімен 16 мыңнан астам жол қозғалысы ережесін бұзу дерегі тіркелді, деп хабарлайды ҚазАқпарат тілшісі.

Жол қауіпсіздігін қамтамасыз ету және көлік құралдарының Ақтөбе қаласына кіруін-шығуын бақылау мақсатында қаланың 7 нүктесіне «Рубеж» аппараттық-бағдарламалық кешені орнатылды. Жүйе мемлекеттік нөмірді, көліктің маркасы мен түсін автоматты түрде тануға, сондай-ақ жылдамдықты анықтауға арналған.

«Ақтөбе-Орск, Ақтөбе-Орал, Ақтөбе-Хромтау, Ақтөбе-Мәртөк, Ақтөбе-Алға бағытында жылдамдық өлшенеді. Жыл басынан бері 16 мыңнан астам жол ережесі бұзылды. Барлығы 163 миллион теңгеден астам айыппұл салынды», - деді облыстық ПД баспасөз қызметінің жетекшісі Ерболат Сарқұлов.