Ақтөбеде Өзбекстан азаматы 147 рет жол ережесін бұзды
Ақтөбе облыстық полиция департаменті Әкімшілік полиция басқармасының қызметкерлері ҚР жол қозғалысы ережесін қасақана бұзған адамды анықтады.
«Мираж-Ураган» модернизацияланған жүйесінің көмегімен Өзбекстан Республикасының азаматы ұсталған. Ол жыл басынан бері 147 рет ереже бұзды.
« ВАЗ-21099 автокөлігінің жүргізушісі 146 рет жылдамдықты асырып, бір рет бағдаршамның тыйым салатын сигналынан өтіп кеткен. Айыппұлдың жалпы сомасы 3 млн 390 мың теңгені құрады. Полиция материал жинап, шешім қабылдау үшін істі әкімшілік сотқа жіберді», - деді облыстық ПД баспасөз қызметінің жетекшісі Ерболат Сарқұлов.
Жыл басынан бері «Мираж-Ураган» модернизацияланған жүйесінің көмегімен бұрын көлік құралын басқару құқығынан айырылған 46 жүргізуші мен 113 мемлекеттік борышкер анықталып, 21 млн теңгеден астам қаражат өндірілді.