Ақтөбеде найзағай түскен ер адам аман қалды
Оқиға 24-шілде күні сағат 08:35-те болды. Ақтөбе облысы ТЖД кезекші-диспетчерлік қызметінің пультіне Мұғалжар ауданы Ембі қаласы Үшқатты сайының маңында ер адамға найзағай түскендігі жөнінде хабарлама келіп түсті.
«Зардап шегуші Ембі аудандық ауруханасына жеткізілді. Қазіргі уақытта оның жағдайы тұрақты. Деректер сүйенсек, 1981 жылғы ер адам малды өріске айдап бара жатқан. Ақтөбе облысы ТЖД тұрғындарға қауіпсіздік ережелерін сақтауды ескертеді. Көбінесе найзағай биік ғимараттарға, ағаштарға түседі. Сондықтан олардан 50-60 метр қашықтықта болғаныңыз дұрыс. Қолшатыр найзағайдан құтқармайды, керісінше апат әкелуі мүмкін. Сол себепті, жалт ойнап тұрған кезде қолшатырды ашуға болмайды. Найзағай ойнап тұрғанда телефонмен сөйлеспегеніңіз дұрыс. Себебі найзағай кей кезде электр бағаналарынан өтеді»,- деп хабарлады облыстық ТЖД баспасөз қызметі.
Еске салсақ, өткен аптада Ақтөбе облысы Шалқар ауданында қатты жел соғып, №2 мектеп шатырының бір бөлігі ұшып кетті. Ауданы 100 шаршы метрді құрайды. Сонымен бірге «Азамат» спорт кешенінің де шатыры зақымданды. Онда 50 шаршы метрі ұшып кетті. Сонымен бірге жеке үйдің шатыры бүлінді. Жергілікті атқарушы билік тарапынан 22 адам мен 5 техника жұмылдырылды.