Ақтөбеде мұнай қалдығына арналған резервуардың жану себебі анықталды

АҚТӨБЕ. ҚазАқпарат – Жаңажол кен орнындағы мұнай қалдығына арналған резервуар дәнекерлеу жұмыстары кезінде өртенді, деп хабарлайды ҚазАқпарат тілшісі.

«СНПС-Ақтөбемұнайгаз» АҚ-ның Жаңажол мұнай-газ өңдеу кешенінде резервуар өртенді. Оқиға 8 қаңтар күні сағат 18:20-да тіркелді. Өрт арада 4 сағат өткенде сөндірілді.

«Көлемі 3 000 текше метр болатын мұнай қалдығына арналған резервуар өртенді. Резервуар қолданылмайды, авариялық жағдайға арналған. Өртті сөндіруге 8 техника мен 35 адам жұмылдырылды. Қосымша ТЖД бастығының міндетін уақытша атқарушы А.Төлешевтің басшылығымен Ақтөбе қаласынан 25 қызметкер мен 5 техника жіберілді. Өрт сағат 22:59-да толық сөндірілді. Қаза болғандар мен зардап шеккендер жоқ. Өрттің шығу себебі – дәнекерлеу жұмыстарын жүргізу кезінде өрт қауіпсіздігі ережелерін сақтамау»,- деп хабарлады облыстық ТЖД баспасөз қызметі.