Ақтөбеде газ құю бекетіндегі өрттің себебін арнайы комиссия анықтайды

НҰР-СҰЛТАН. ҚазАқпарат – Өрт кезінде газ құю бекеті аумағында 2 қызметкер болған. Сондай-ақ, куәгерлердің айтуынша, өртенген цистерна бос болған, деп хабарлайды ҚазАқпарат тілшісі Төтенше жағдайлар министрлігі өнеркәсіптік қауіпсіздік комитетінің баспасөз қызметіне сілтеме жасап.

«17 шілде жергілікті уақытпен сағат 19:02-де Ақтөбе облысы Алға ауданының төтенше жағдайлар бөлімінің «101» желісіне «Лимангаз» ЖШС автогаз құю станциясындағы өрт туралы хабар түсті. Өртті Ақтөбе облысы Алға аудандық өрт сөндіру қызметі сөндірді», - делінген ресми ақпаратта.

Хабарламада айтылғандай, өрт салдарынан қаза тапқандар мен зардап шеккендер жоқ.

«Алдын ала ақпарат бойынша, газ құю бекеті күндізгі сағат 12-ден бастап жұмыс істемеген. Бекет аумағында 2 қызметкер болған. Куәгерлердің айтуынша, өртенген цистерна бос болған», - дейді ведомстводан.

Бүгінде Алға ауданының төтенше жағдайлар бөлімі өрт себебін анықтау үшін техникалық сараптама тағайындады.

Сондай-ақ, өнеркәсіптік қауіпсіздік комитеті болған жайттың мән-жайын анықтауға қатысты комиссия құрылатынын және оқиға орнына мемлекеттік инспектордың жіберілгенін хабарлап отыр.

«Толық ақпарат тергеу жүргізіліп, өрттің бүкіл мән-жайы анықталғаннан кейін ұсынылады», - деген түсінік берілді комитеттен.

Еске салсақ, бұған дейін Ақтөбе облысы Алға ауданындағы газ құю бекетінде цистерна жарылып, көлік пен әкімшілік ғимараттың жанып кеткенін хабарлаған едік.