Ақтөбеде ауылдық округ әкімі жеке шаруаға 40 жылқы алуға бөлінген ақшаны қалтаға басқан

НҰР-СҰЛТАН. ҚазАқпарат - ҚР ҚМ Қаржы мониторингі комитетінің Ақтөбе облысы бойынша Экономикалық тергеу департаменті Мұғалжар ауданы ауылдық округі әкімінің алаяқтық әрекетінің жолын кесті, деп хабарлайды ҚазАқпарат.

«Аграрлық несиелік корпорация» АҚ Ақтөбе қаласындағы филиалы «Құлан» бағдарламасы бойынша шаруашылық қожалығының иесіне 40 жылқы сатып алу үшін жалпы сомасы 11 840 000 теңгені құрайтын несие бергені анықталды.

Алайда, бөлінген несие шаруа қожалығының иесіне жетпеген.

Ауылдық округтің әкімі жалған құжаттар мен түбіртектерді пайдаланып, көрсетілген қаражатты алып, оны өз қажеттіліктеріне жұмсаған.

Аталған факті бойынша сотқа дейінгі тергеу амалдары ҚР ҚК 190-бабы 4-б. (аса ірі көлемде алаяқтық) бойынша жүргізіліп, оның аясында ауылдық округ әкіміне «қамауға алу» шарасы қолданылды.

Қазіргі уақытта сотқа дейінгі тергеу аяқталып, қылмыстық іс сотқа жолданды.