Ақтөбеде 13 жасар қыз жиырмасыншы қабаттан секіріп кетті

АҚТӨБЕ. ҚазАқпарат – Ақтөбеде 13 жастағы жасөспірім өз-өзіне қол жұмсады. Ол 25 қабатты үйдің 20-қабатынан секіріп кетті, деп хабарлайды ҚазАқпарат тілшісі.

Қайғылы оқиға кеше сағат 18.45-те Ақтөбе қаласында тіркелді.

Сол кезде қала тұрғыны полиция бөліміне хабарласып, 11-шағын ауданындағы № 112 «В» үйінің кіреберісінде кәмелет жасына толмаған қыздың жатқанын айтқан.

Полиция жасағы аталған үйдің кіреберісінен 2008 жылы туған жеткіншектің денесін тапты.

Ол 25 қабатты үйдің 20-қабатындағы кіреберістің балконынан секіріп кеткен.

«Кәмелетке толмаған бала алған жарақатынан жедел жәрдем келгенге дейін қаза болды. Оқиғаның себептері анықталып жатыр. Қазір Қылмыстық кодекстің «Өз-өзіне қол жұмсауға жеткізу» бабы бойынша сотқа дейінгі тергеу жүргізіліп жатыр», - деді облыстық ПД баспасөз қызметінің жетекшісі Ерболат Сарқұлов.