Ақтөбе әуежайы он күнге жабылды

АҚТӨБЕ. ҚазАқпарат - Ақтөбе әуежайы 17-27 наурыз күндері аралығында қызмет көрсетуін тоқтатады, деп хабарлайды ҚазАқпарат тілшісі.

Әлия Молдағұлова әуежайының әкімшілігі әлеуеттік желідегі парақшасы арқылы хабарландыру таратты. Онда әуежайдың 10 күн бойы жабық болатыны ескертілген.
«Әуежайдың 17-27 наурыз күндері аралығында жөндеуге жабылатынын хабарлаймыз. Билеттерді қайтару немесе қайта брондау сұрақтары бойынша сатып алу орындарына жүгінуді сұраймыз. Қазіргі жағдай үшін кешірім сұраймыз», - деп жазылған парақшада.

Айта кетейік, Азаматтық авиация комитеті әуе айлағының 17 наурыздан бастап жабылатынын мәлімдеген еді. Облыс әкімдігі нысанда екі апта жөндеу жүргізілетінін айтты. Кейін күндіз жөндеу жүргізіліп, түнде ұшуға рұқсат берілетіні жарияланды. Ал 12 наурызда ұшып-қону жолағында жөндеу жұмыстарын жүргізу барысында жалдап алынған арнайы техника істен шыққаны, сол себепті бірнеше рейстер кешіктірілгені мәлім етілді.

Бүгінгі хабарламаға сәйкес, әуежай мүлдем жабылады.