Ақтаулық қыз суда жүзуден рекорд орнатты
Шымкентте 31 мамыр күні аяқталған суда жүзуден ҚР чемпионатында 2005 жылы туған және одан жас 450 ұлдар мен қыздар қатысты. Онда Маңғыстау облысының атынан Желкенді спорт балалар мен жасөспірімдерге арналған спорт мектебінің суда жүзу бөлімінің тәрбиеленушілері өнер көрсетті.
Томирис Молжанова 200 метрге қашықтыққа брасс әдісімен және 400 метрге кешенді жүзуден осы жастағы қыздар арасында және осы қашықтық бойынша Қазақстан Республикасының рекордын орнатып, чемпион атанды. Молжанова көрсеткен нәтиже 5 минут 51,63 секундты құрады.
«Менің жүзумен айналысып жүргеніме 4 жыл болды. Қазақстан чемпионатында қол жеткізген жетістік біздің бапкеріміз екеуміздің республикалық деңгейдегі бірінші жеңісіміз»,-деді Томирис.
Радмир Ахмедьянов болса, 400 метр қашықтыққа кешенді жүзу әдісі бойынша «қола» жүлдеге қол жеткізді.
«Бұл чемпионаттың бағдарламасындағы ең бір күрделі қашықтықтардың бірі, соған қарай ол спортшыдан мықты техникалық дайындықты қажет етеді»,-деді Александр Кабаргин.