Ақтауда үстіне алтыншы қабаттан диван құлаған жігітке елордалық дәрігерлер ота жасайды
00:11, 29 Қаңтар 2023
АҚТАУ. ҚазАқпарат - Ақтауда үстіне алтыншы қабаттан диван құлаған жігітке елордалық дәрігерлер ота жасайды, деп хабарлайды ҚазАқпарат тілшісі.
«Елордалық дәрігерлер жігітке ота жасайды. Өзге ақпараттар отадан кейін болады», - деп мәлім етті Маңғыстау облыстық ауруханасының баспасөз қызметінен.
Айта кетейік, Ақтауда 39 жастағы жігіттің үстіне диван құлап, оның ауруханаға ауыр халде жеткізілгенін жазған едік. Дәрігерлердің айтуынша, сырқаттың денесі түгел сал болып қалған, қозғала алмайды. Маңғыстау облыстық көпбейінді ауруханасының баспасөз хатшысы Гүлмира Сүтібаева мәлім еткендей, мойын омыртқасы сынған, жұлыны ауыр жарақаттанған.
Оқиға 12 қаңтар күні сағат 13:00 шамасында 11 шағын ауданның 41-үйінде болған.