Ақтауда теңіз жағалауындағы заңсыз кәсіпкерлікті тоқтату жұмыстары басталды
Әкімдік қызметкерлері мен коммуналдық мекемелер бірлесіп, 9 А, 14 А және 15 А шағын аудандары тұсындағы теңіз жағалауында балаларға арналған батуттар мен велосипед, ойын машиналары сияқты қозғалыс құралдарын алып тастау жұмыстарын бастады.
«Біз бірнеше рет заңсыз павильондарды алып тастау, сондай-ақ балалар ойнайтын аттракциондарды жағалаудан шығару туралы жазбаша ескертулер бердік. Алайда, кәсіпкерлер заңға бағынбай, жұмыстарын жалғастыра берді. Қазір заң аясында павильондар мен өзге де құрал-жабдықтарды алып тастау жұмыстары басталды. Бұл заңсыз әрекет жағалаудың көркін бұзып қана қоймай, қауіпсіздікке де әсер етеді. Өйткені, бұл кәсіпкерлер балалардың қауіпсіздігіне жауап бермейді», - дейді Ақтау қаласы әкімінің орынбасары Ербол Жұмағазин.
Мамандардың айтуынша, бүгінде жағалауда шамамен 35 кәсіпкер заңсыз жұмыс істейді. Мереке кезінде бұл көрсеткіш 55-ке жетеді.
«Қала тұрғындары арасында сауалнама жүргізілді. Нәтижесінде халықтың басым бөлігі теңіз жағалауындағы кәсіпкерлікке қарсы екені анықталды. Бұл орындарда кәсіп жүргізіп келген тұлғаларға ұсыныс ретінде «Ақбота» саябағы мен бұрын меморандум жасалған сауда базарларының аумағына көшу ұсынылды», - деді Е. Жұмағазин.
