Ақтауда шенеунік ірі көлемде айыппұл төледі

АСТАНА. ҚазАқпарат - Ақтау қалалық сәулет және қала құрылысы бөлімі» мемлекеттік мекемесінің басшысы Е.Сәркеновке 408 580 теңге мөлшерінде айыппұл салынды, деп xабарлайды ҚазАқпарат тілшісі ҚР Мемлекеттік қызмет істері және сыбайлас жемқорлыққа қарсы іс-қимыл агенттігінің Маңғыстау облысы бойынша департаментінің баспасөз қызметіне сілтеме жасап.

ҚР Мемлекеттік қызмет істері және сыбайлас жемқорлыққа қарсы іс-қимыл агенттігінің Маңғыстау облысы бойынша департаментінің хабарлауынша, ішінара және жоспардан тыс тексерулердің нәтижесінде, үстіміздегі жылдың 5 айында мемлекет көрсететін қызметтер саласында рұқсат берудің тәртібін, мерзімін бұзу және негізсіз бас тарту деректері Ақтау және Жаңаөзен қалалары, Мұнайлы ауданында болып, жалпы сомасы 541 125 теңге көлемінде айыппұл салынған.

Ал ең ірі көлемдегі айыппұл Ақтау қаласының әкімдігінің шенеунігінен өндіріліп отыр. Атап айтқанда, барлығы 16 әкімшілік хаттаманың 10-ы «Ақтау қалалық сәулет және қала құрылысы» мемлекеттік мекемесінің басшысы Е.Сәркеновке қатысты толтырылған. 

«Шенеунікке қатысты іс Қазақстан Республикасы әкімшілік құқықбұзушылық туралы Кодексінің 465 бабының 2 тармағы, яғни рұқсат беруден бас тарту және осы бөлімнің 3 бабы, яғни әкімшілік жаза қолданылғаннан кейін бір жыл ішінде қайталап жасаған әрекеті үшін жаза қолданылды», - деді ҚР Мемлекеттік қызмет істері және сыбайлас жемқорлыққа қарсы іс-қимыл агенттігінің Маңғыстау облысы бойынша департаментінің басшысы, Әдеп жөніндегі кеңес төрайымы Нұргүл Жанназарова. 

Осылайша бір жылдың ішінде екі рет заң бұзған әкімдік қызметкері әкімшілік жазамен құтылды.   

Айта кету керек, өткен жылдың осы мерзім аралығында заңға қайшы әрекеттерге жол берген шенеуніктерге қатысты уәкілетті органмен 6 әкімшілік іс қозғалса, биыл бұл көрсеткіш 16 дерекке артық болып отыр.